Կենսաբազմազանության մեծ մասը դարեր շարունակ ավանդական մեթոդներով օգտագործվել է տեղաբնակների կողմից և երկրի սոցիալ-տնտեսական զարգացմանը զուգընթաց անընդհատ ընդլայնվել է կենսաբազմազանության բաղադրիչների ներգրավումը մարդու գործունեության տարբեր ոլորտներում: Գյուղատնտեսության բնագավառում այն օգտագործվում է պարենի, անասնակերի ապահովման, սելեկցիոն աշխատանքների և այլ նպատակներով: Սննդարդյունաբերության մեջ խոտաբույսերը, պտուղները, հատապտուղները, արմատապտուղները հանդիսանում են հումքի կարևոր աղբյուրներ` որպես պահածոյանյութ, համեմունք և այլն: Դեղագործության մեջ վայրի բուսատեսակները որպես բուժամիջոց անփոխարինելի աղբյուր են հանդիսանում: Շինարարության մեջ անտառային պաշարներն օգտագործվում են որպես շինանյութ: Բնական լանդշաֆտների էսթետիկական և ռեկրեացիոն, այդ թվում նաև բուժիչ-առողջարանային պաշարները, հիմնականում պայմանավորված են բուսակենդանական աշխարհի բազմազանությամբ ու հարստությամբ: